Como nun tengo oficiu nin beneficiu claros, dedícome a poner clases particulares. Entamé a facelo casi como un favor y dempués de dos años llargos ta costándome un triunfu enfrentame cola bestia parda que teo por escolín. Nun ye que seya un mal guah.e -val, buenun nun ye tampoco...-, pero zote... pocos debe d'haber como él -o eso quiero creyer pol bien del país-.

El casu ye qu'esti branu -como l'anterior- dexó hestoria y xeografía pa setiembre. Nihil novum sub sole, nun vos preocupar, qu'al chaval lo de chapar nun-y va y como esta va d'eso pues diz que ye que-y cuesta. Magar que lo esperable ye que me quexare de los conteníos de la parte d'hestoria -qué nacionaliegu ye esti llibru, qué partidista, s'esperaba que dixere-, nesta parte nun atopo quexa dala. Teo de reconocer qu'esti añu aprendí cosuques que na mio época nun se víen, ¿qué sabía yo fai...años... quién yera Frenán González o Wilfredo el Velloso? ¿cómo diba a pensar qu'en cada tema hubiera una pregunta dedidaca a la vida les muyeres? -otra cosa ye que'l proferosr, por llamalu daqué, d'esti futuru ser pensante que ye'l mio escolín diga que nun s'estudia y que nun entra pal esame...-.

La cosa ye -que me pierdo- que na parte de xeografía quedo ablucada, y eso que yo de xeografía sé cuatro cosuques más que básiques y d'ehí nun salgo. Pero, anque na más seya por lóxica, si yo veo que hai un país nomáu Corea del Sur espero qu'apaeza otru que se llame Cora del Norte. ¡Pero non! Nos apuntes de la llibreta nun apaez. Podríemos pensar que'l guah.e taba na lluna de Valencia nel momentu que'l personax al que hai que tratar de "profesor" dictaba y taríemos erraos, porque los apuntes son fotocopies pegaes na llibreta -nun vayan cansar los guah.es de tanto copiar-. "¡Nun pienses mal, Ms Shirley! Foi casualidá que'l país que falte seya'l anticapitalista. Que Cuba ta y tamién Venezuela". Quien nun debía de tar a lo que se celebraba, polo visto, yera quien fizo los apuntes. Pero -¡ay mamina!- eso yera solo l'aperitivu, el platu fuerte topábase al llegar a África y ponenos a estudiar la población y ver "Razas". ¿Cómo? ¿Hai un epígrafe que se titula "Razas"? ¿Y esto solo n'África? N'Europa, Améria y Asia ¿non? -teo de dicir qu'Oceanía desapaeció del temariu, tovía nun sé si porque la tragó un maremoto al estilu de l'Atlántida o porque nun ye "importante" bastantina pa'l "docente"-.

"Nada, a ver qué nos cuenta'l Señor Profesor" - porque sí, ye un señor y polo visto de la vieya escuela-, pienso distrayía mientres preparo l'esquemina (¿qué pasa? ¡¡Soi una profesora perbona que fai esquimines y xuegos pal seya más fácil!!. Y lo que topé foi que n'África hai dos races -¿solo dos?-: la raza blanca y la raza negra. Dientro la raza blanca que s'atopa al norte -¡minipuntu pal profe!- métenos a los semites (árabes y xudíos), a los camites -mai sentinti!- (bereberes exicios y del Atles y los tuareg del desiertu) y a los hamites -soi una inculta de la vida... yá lo anunciare- (etíopes d'Abisinia y Somalia). Y dientro la raza negra atopamos "dos grandes grupos étnicos": unu d'orixe PREHESTÓRICU (que son los pigmeos, los bosquimanos y los hotentotes) y otru d'orixe más reciente (que son los sudaneses y los bantúes).

Y equí yera onde yo quería aportar ¿qué implicaciones tien dicir d'un grupu étnicu, que pa más inri ta minorizáu y excluyíu, que ye prehestóricu? ¿Qué pue suponer na cabeza d'unos rapacinos que nun son a discurrir más allá de si poner pendiente porque lu trae Cristiano Ronaldo o non, que-yos digan qu'hai, anque solo seya una y non yá un "grupu étnicu" enteru, d'orixe prehestóricu? ¿Nun ye una forma más de discriminación y si acasu la peyor? Porque ye una manera de inculcar prexuicios a los guah.es faciendo que pasen desapercibíos. A min que me suena a perversa maquinación -por muncho que-y pese y porfíe dalgún académicu faltosu- eso de "l'home descubrió'l fueu" porque fai que nos nuesos maxines apaeza un señor con taparrabos -nunca, nunca, nunca una moza- garrando un tueru prendíu, qué imáxines horribles nun me provocará eso de clasificar les presones como prehestóriques/más recienes/blanques.

Patriarcalismu me dixeron que se llama eso ya en mio casa mírenme desesperaos cuando digo convencía a mitá la cena que nun hai derechu a estes coses, que la sociedá ye machista -ensin falta d'haber nomao a una muyer en tolos apuntes- y llueu suspiro y sigo masticando la cena que se me queda nel gañote tola nueche.

La verdá ye...

Cuando entamé esti blog fícelo col envís de tener un sitiu onde desfogame. Tener un diariu en papel ye más prestoso, pero ye un crime imperfeutu: siempre dexa rastru. Facelu nun archivu .doc tamién dexa buelga. La idea de dexalu colgáu nun puntu inexautu del ciberespacio paecióme romántico nun momentu dau: ¿qué posibilidaes había de que daquién diere col sitiu? ¿A cuántos naufragos salvaren porque la botella de so aportare a puertu? Pero como diz la canción "en las películas a los malos les pierde la boca..." y a mi piérdeme la mía. Y esto yá nun ye secretu dalu. Yá nun ye (tan) romántico. Ye un nome guapu desperdiciau, un refuxu albentestate.

Por embargu, güei quería contar daqué y nun sabía ónde. Escribo pa mi, facei'l favor. Nun busco aplausu, nin castigu.

Por estes coses que tien la vida, una atópase un buen día nun sitiu raru. Nun sabe mui bien cómo aportó ellí pero, por suerte (pienso agora), nun pue fuxir. El mio día entamó güei nunes xornaes sobre la familia na Facultá de Ciencies de la Educación. Había ponentes mui variaos, pero los que triunfaron foron unos represtantes de "Las comunidades de las Doce Tribus". Yo yera (soi) una inorante sol tema pero pudi sacar varies conclusiones: ellos, dixeron, proponen un nuevu orden social, tolerancia, sistemas educativos... Podríemos dicir que son "hippies": melenes perllargues (n'homes y muyeres), barbes, ropa "alternativa" y un estilu de vida retiráu, comiendo productos ecolóxicos (o cómo se diga)... Son d'esta xente que cuando les sientes falar apetezte enllenar una mochila con cuatro trapos, tres llibros y una llibreta y un boli, pa marchar a vivir lloñe.
Yo, que tengo'l defeutu del maxín, yá me taba viendo cultivando una güertuca y andando descalza fasta'l riu a por agua... Pero taba yo disfrutando de una sabrosa mazana maxinaria a la solombra dun castañu mientres lleía un llibrucu (que, por supuesto, tenia les tapes de cueru y pinta de vieyu) cuando'l mio futuru esvaneciose nel conxuru de cuatro pallabres: "No somos una secta". El final del cuentu de fades ye qu'ellos prediquen l'evanxeliu y viven como Cristo mandaba vivir. Nun me paez el peor de los males...
La cosa ye que, d'un tiempu a esta parte, vengo pensando en términos pergrandes (lleer tanta filosofía y teoría feminista ye lo que tien, que una va perdiendo a pocos la inocencia de pensar que les coses son blanques o negres). ¿Qué ye una secta? pensé en medio la ponencia... Ellos prediquen la verdá. La verdá de so. Pero la verdá nun esiste. Nun hai una Verdá. Y eso ye un problema. Dixeron ente otres coses que, por desgracia, el que tien el poder, la "doctrina correuta", persigue y aniquila siempre al que tien la "doctrina incorreuta". Tener el poder ye, a fin de cuentes, tener munchu mieu. Tener mieu de perdelu; matar, oprimir, castigar al otru. Alteridá nel sentíu que yo la toi entendiendo hasta agora. Nun ye lo que soi, ye lo que nun soi. Pero la "doctina correuta" nun pue servise de la represión y el maltratu, por mui diferente que seya de la que nosotros tenemos. Grita-y a daqué "¡¡¡secta!!!", como dicía el paisanu güei, ye volver milenta años patrás y gritar "¡¡¡bruxa!!!". Y, por embargu, soi la primera que fai xuicios de valor de too: esto ye asina, esto nun ye asina...
Pensamos que somos tolerantes pero... ¿el fechu de que yo espertara de la mio ensoñación a la invocación de la pallabra "secta", nun demuestra tolo contrario?