Verídico

No que va de selmana:
- Vacié güevos crudos cola boca (soplando por un furaquín).
- Presencié la grabación d'un programa d' "Inocente, inocente" de A3.
- Tuve nes mios manes más de 1.600€ ente billetes y monedes (y tuve que lo contar).
- Vi a un elefante (que xuega al fúbol) tan de cerca que casi m'arrimo a tocalu.
- Monté nun "mini" (¡¡delante!!).
- Emocionéme al ver feliz a la xente que-y tocó la lotería (y eso que nun vi ni un duru).
- Grité dentro una clas enllena xente pa que me atendieren (¡coime, soi la profesora!).
- Pinté un güevu con témpera y pegé-y cresta, picu, pates y güeyos.
- Tuve baxo'l mesmu techu que dos futbolístes de la selección, dos cantantes, un árbitro internacional, un campeón del mundu de kárate...
- Tomé dos vasos de té moruno (dulce y calentino).

De xuru qu'escaecí daqué pero paezme que con eso yá fui feliz...

La verdá ye...

Cuando entamé esti blog fícelo col envís de tener un sitiu onde desfogame. Tener un diariu en papel ye más prestoso, pero ye un crime imperfeutu: siempre dexa rastru. Facelu nun archivu .doc tamién dexa buelga. La idea de dexalu colgáu nun puntu inexautu del ciberespacio paecióme romántico nun momentu dau: ¿qué posibilidaes había de que daquién diere col sitiu? ¿A cuántos naufragos salvaren porque la botella de so aportare a puertu? Pero como diz la canción "en las películas a los malos les pierde la boca..." y a mi piérdeme la mía. Y esto yá nun ye secretu dalu. Yá nun ye (tan) romántico. Ye un nome guapu desperdiciau, un refuxu albentestate.

Por embargu, güei quería contar daqué y nun sabía ónde. Escribo pa mi, facei'l favor. Nun busco aplausu, nin castigu.

Por estes coses que tien la vida, una atópase un buen día nun sitiu raru. Nun sabe mui bien cómo aportó ellí pero, por suerte (pienso agora), nun pue fuxir. El mio día entamó güei nunes xornaes sobre la familia na Facultá de Ciencies de la Educación. Había ponentes mui variaos, pero los que triunfaron foron unos represtantes de "Las comunidades de las Doce Tribus". Yo yera (soi) una inorante sol tema pero pudi sacar varies conclusiones: ellos, dixeron, proponen un nuevu orden social, tolerancia, sistemas educativos... Podríemos dicir que son "hippies": melenes perllargues (n'homes y muyeres), barbes, ropa "alternativa" y un estilu de vida retiráu, comiendo productos ecolóxicos (o cómo se diga)... Son d'esta xente que cuando les sientes falar apetezte enllenar una mochila con cuatro trapos, tres llibros y una llibreta y un boli, pa marchar a vivir lloñe.
Yo, que tengo'l defeutu del maxín, yá me taba viendo cultivando una güertuca y andando descalza fasta'l riu a por agua... Pero taba yo disfrutando de una sabrosa mazana maxinaria a la solombra dun castañu mientres lleía un llibrucu (que, por supuesto, tenia les tapes de cueru y pinta de vieyu) cuando'l mio futuru esvaneciose nel conxuru de cuatro pallabres: "No somos una secta". El final del cuentu de fades ye qu'ellos prediquen l'evanxeliu y viven como Cristo mandaba vivir. Nun me paez el peor de los males...
La cosa ye que, d'un tiempu a esta parte, vengo pensando en términos pergrandes (lleer tanta filosofía y teoría feminista ye lo que tien, que una va perdiendo a pocos la inocencia de pensar que les coses son blanques o negres). ¿Qué ye una secta? pensé en medio la ponencia... Ellos prediquen la verdá. La verdá de so. Pero la verdá nun esiste. Nun hai una Verdá. Y eso ye un problema. Dixeron ente otres coses que, por desgracia, el que tien el poder, la "doctrina correuta", persigue y aniquila siempre al que tien la "doctrina incorreuta". Tener el poder ye, a fin de cuentes, tener munchu mieu. Tener mieu de perdelu; matar, oprimir, castigar al otru. Alteridá nel sentíu que yo la toi entendiendo hasta agora. Nun ye lo que soi, ye lo que nun soi. Pero la "doctina correuta" nun pue servise de la represión y el maltratu, por mui diferente que seya de la que nosotros tenemos. Grita-y a daqué "¡¡¡secta!!!", como dicía el paisanu güei, ye volver milenta años patrás y gritar "¡¡¡bruxa!!!". Y, por embargu, soi la primera que fai xuicios de valor de too: esto ye asina, esto nun ye asina...
Pensamos que somos tolerantes pero... ¿el fechu de que yo espertara de la mio ensoñación a la invocación de la pallabra "secta", nun demuestra tolo contrario?

Herexía o qué atrevíos somos los inorantes

VALME ASINA

Si fuere Dios
y tuviere'l secretu
fadría
un ser claváu a ti,
tastiaríalu
(igual que faen los panaderos
cuando tastien el pan, ello ye:
cola boca),
y si esi sabor fuere
igual qu'el tuyu, vamos
el to mesmu golor, y el to xeitu
al sorrir,
y de callar la boca
y de garrar la mio mano fríamente,
y de besanos ensin mos mancar
-d'esto sí que toi sigura: pongo
tola mio atención cuando te beso-
entós,
si yo fuere Dios,
diba repetite y repetite
siempre'l mesmu y siempre distintu,
ensin cansar xamás del xuegu idénticu,
ensin dexar tampoco aquel que fuiste
pol que dibes ser dentro de nada,
yá nun sé si me desplico, pero quiero
esclariar que si yo fuere
Dios, fadría
tolo posible por ser C******* B****
pa querete tal como te quiero,
pa esperar con calma
a que te crees tu mesmu cada día,
a que sospriendas peles mañanes
la lluz recién nacida cola to propia
lluz, y cuerras
la cortina intocable que separta'l
mio sueñu de la vida,
resucitándome cola pallabra
Llázaru alegre,
yo,
moyada aína
de solombres y pereza,
sosprendía y perdía
na contemplación de too aquello
que, n'unión de min mesma,
recuperes y salves, mueves, dexes
abandonao cuando - llueu- calles...
(Escucho'l to silenciu.
Siento
costelaciones: esistes.
Creyo en ti.
Yes.
Válesme.)


Y que me perdone Ángel González